ISTIRAHAT DUKIN

Yang namonyo begawe tu cengki untuk nyari duit atau selawat citak. Apo dan jugo dimano bae tempat gawean. Nak dio begawe di kantor, pemerintah atau jugo swasta,  begawe jadi sopir, kenek, tukang ojek, kuli, tukang ulo, bejualan di toko atau jugo di warung dan lain lainnyo. Kareno begawe untuk nyari duit, jadi galak dak galak mesti semangat.


Apo lagi kalu yang begawe bukan ngarepke gaji bulanan. Pecak bejualan, nyupir, ngojek, tukang parker, tukang ulo dan jugo gawe lainnyo. Jelas dak pacak nak nyantai nyantai bae. Lokak dapur dak berasep. Pecak jadi tukang ulo bae misalnyo, amon gawenyo banyaklah nyantai, banyaklah bekelakarnyo, dan apo lagi amun banyaklah tiduk cengki yang cuma dio dapetke taik mato bae. Yang namonyo nyari duit mesti nak semangat, segalo selo dan jugo bucu nak diawai nian. Kareno yang namonyo rezeki tu bukannyo bedepuk turun dari langit. Mesti nak diperjuangke.


Cuman walaupun semangat nak nyari rezeki, jangan pulok laju menghalalke segalo caro. Laju maen terabas bae.  Laju nak mudike wong. Berejo nak nyikut sano nyikit sini. Sisip sisip laju nerajangke wong pulok. Pokoknyo makmano caronyo dapet duit banyak.
Pecak itu pulok dengan pejabat di pemerintahan, yang laju galak berurusan dengan aparat penegak hukum. Pecak misalnyo Komisi Pemberantasan Korupsi (KPK). Idak lagi ngejoke aturan yang ado. Pokoknyo makmano caronyo pacak menuhi celengan di selo ranjang tu dengan selawat citak. Ado jugo yang diem diem ngadoke pungutan liar. Yang model pecak itu cengki bae idak cocok, dan jugo idak bener.


Sudah itu makmano pun jugo, kito mesti percayo amon yang namonyo rejeki tu sudah ado yang ngatur. Amon bukan rezeki kito, mugolah  kito nak jungkir balik ngejokenyo masih dak dapet di kito tulah. Amon uji kawan Cek Mamad, Mang Arif, rejeki macan idak bakal tetuker dengan rejeki elang. Yang penting kito jangan putus asa. Pokoknyo berejo terus nyari rejeki.


Persaingan cengki bae perlu, tapi pastinyo persaingan sehat. Apo dengan caro meningkatke pelayanan, atau jugo nggunoke teknologi modern pecak misalnyo teknologi informasi. Kareno khabarnyo nian, mak ini ari, yang namonyo informasi tu pacak jadi duit. Pecak tukang ulo bae, amon duluan dapet informasi, cengki peluangnyo untuk boleh duit lebih besak.


Apo yang Cek Mamad omongke ni, sebenernyo idak lebih dari kelakar wong kaki limo bae. Bener apo idak, cengki kamu tula yang ngerasokenyo. Temasok jugo manfaatnyo. Amon pecak kateik manfaatnyo, dak usah diagu’i igo. Maafke bae. Namonyo bae kelakar.
Nah, kareno ado urusan lain, Cek Mamad nak istirahat dikin bekelakar.  Paling idak duo bulan. Mudah mudahan bae gek kito pacak bekelakar lagi. Ye.
Palembang, Agustus 2017