MUSIM HAJI 1438H/2017

Cek Mamad percayo nian, amon yang namonyo naek haji tu merupoke panggilan dari Allah.  Amun memang ado panggilan, ado bae jalan.  Ado yang pacak naek haji kareno dibiayai oleh pemerintah, misalnyo jadi petugas haji. Ado jugo yang pacak naek haji kareno punyo prestasi, misalnyo bae juara ngaji. Ado jugo yang dibiayai oleh kantornyo untuk meliput, pecak misalnyo wartawan. Pokoknyo macem macem.

Cuman segalo gawe tu nak diniatke dikin.  Kalo niat la ado, tinggal betekad untuk pacak  mewujudkenyo. Kito cengki pernah maco berita kalu ado tukang urut yang pacak nunaike ibadah haji dengan caro nabung sedikit demi sedikit.  Upah dari jasanyo ngurut tu sebagian dio simpen dalem celengan. Sedikit demi sedikit. Sampe akhirnyo cukup untuk biaya naek haji.

Memang idak gampang. Perlu tekad, kesabaran dan jugo do’a. Kareno segalo usaha tu perlu dibarengi dengan do’a. Cuman  amun niat bae lagi dak kateik makmano nian pacak nak berangkat nunaike ibadah haji.  Mugolah punyo selawat citak bekarung karung, dan jugo reto bendo ado dimano mano.

Nah, pecak itu jugo tentunyo dengan calon jamaah haji Indonesia musim haji 1438 H tahun2017 ini, cengki dimulai dengan nian dikin. Kareno calon jamaah haji yang bakalan diberangkatke ke tanah suci taun ini, paling idak sudah mendaftar untuk nunaike ibadah haji dari taun 2010 yang liwat. Artinyo sudah nak 7 taun nunggunyo.

Amon maco berita di koran, calon jamaah haji embarkasi Plembang kloter pertamo asal Sumatera Selatan rencanonyo akan masok ke asrama haji  tanggal 3 Agustus 2017, besoknyo tanggal 4 Agustus 2017 baru diterbangke dari bandara Internasional Sultan Mahmud Badaruddin II ke bandara internasional Pangeran Mohammad bin Abdul Aziz di Madinah dengan nggunoke kapal terbang Saudi Arabian Airlines.

Dari embarkasi Plembang yang bakalan diberangkatke ke Saudi Arabia sebanyak 19 kloter, yang merupoke calon jamaah haji asal Provinsi Sumatera Selatan dan jugo Provinsi Bangka Belitung. Jumlah calon jamaah haji, musim haji 1438H/2017, sebanyak 8.104 calon jamaah haji. Dimano 7.035 jamaah berasal dari Sumatera Selatan dan 47 wong Tim Pemandu haji Daerah (TPHD), sedangke sisanyo sebanyak 1.069 wong jamaah haji berasal dari Provinsi Bangka Belitung.

Kalu kateik aral melintang, pecak taun taun sebelumnyo, proses pemberangkatan calon jamaah haji embarkasi Plembang tu direncanoke bakal dilepas langsung oleh Gubernur Sumatera Selatan Alex Noerdin.

Payu kito do’ake samo samo, semoga calon jamaah haji yang akan diberangkatkan untuk memenuhi panggilan Allah di musim haji taun ini, dimudahkan dan dilancarkan perjalanan ibadahnya dan menyadi haji yang mambrur.  Aamiin.


Palembang, Juli 2017