LUM MATI LUM JERO

Cek mamad

Maco berito di koran kito soal budak mati kareno minum minuman keras oplosan, Cek Mamad tecengeh dewek. Bukan apo apo. La banyak nian budak yang tega punah kareno nekat minum minuman keras oplosan. Cuman pecaknyo masih bae idak jero jero. Idak tau nian ngapo. Istilah wong tu, lum mati lum jero.
               

Yang namonyo minuman keras tu, minuman beralkohol yang mengandung etanol, dimano didalem etanol tu dewek terdapet bahan psikoaktif, dan kalu diminum dalem jumlah tertentu  pacak ngakibatke gangguan organik, berupo gangguan caro bepikir dan jugo prilaku sehinggo hilang kesadaran alias mabok. Pecak itulah kiro, yang Cek Mamad tau dari maco maco di mbah goegle.
               

Kalu sudah mabok biasonyo matonyo jadi abang, bejalan jugo miring ke kiri miring ke kanan, pecak dunio ni dak rato bae. Amon ngomong jugo la sebasingan bae, berhalusinasi dan gampang nian tesinggung. Caro wong yang idak pacak lagi ngontrol dirinyo dewek. Akibatnyo sering nian tejadi tindak kriminal, pecak misalnyo bae bebala, atau jugo tindak kriminal lainnyo. Akibat lainnyo jugo pacak ngakibatke kematian, kareno keracunan.
               

Minuman keras itu dewek sebenernyo nian idak boleh dijual di tempat umum, wong nak jualnyo jugo mesti ado izin nian. Cuman dak tau mak mano caronyo, barang haram itu selalu bae pacak diejoke oleh wong wong tertentu. Terutamo wong galak mabok. Padahal la nemen kito maco berita soal pemusnahan minuman keras hasil dari razia aparat plisi.
               

Apo mungkin kareno la saro nak dapetkenyo. Mano minuman yang ado dicampur campur. Pecak anggur dicampur dengan bir, dicampur pulok dengan vodka, dicampur pulok dengan tuak. Ado pulok yang nyampurnyo dengan obat tiduk atau jugo obat sakit kepalak. Ado bae jugo yang dicampur dengan kopi. Kapan bae minuman keras tu dicampur budak dengan sambel tigo atau jugo kuah pindang.
               

Apo dio nian tujuannyo nyampur nyampurke minuman keras tu, Cek Mamad idak pulok terti igo. Apo mangke gancang mabok, apo memang la malek idup. Soalnyo minum minuman keras  yang kadar alkoholnyo tinggi, amun diminum belebihan pacak ngakibatke kematian. Apo lagi minuman keras yang dicampur campur alias di oplos.

Pecak yang diberitake koran kito tu. Tigo wong laju tega punah kareno minum minuman keras yang di oplos, sementaro duo kawan lainnyo masih teseler di rumah sakit. Amon la sudah pecak itu, tinggal penyesalannyo bae.
              

Kareno itu pulok, payu berentilah minum minuman keras tu. Apo lagi minuman keras yang sudah di oplos. Pikirke bahayo samo dosonyo.  Lemak kito ngopi atau ngeteh bae. Amon dak tu minum susu. Mangko sehat.

Ye dak.

Palembang, Juli 2017