Bisa Dipercaya

LAKI BINI JADI KURIR SHABU

Pecaknyo masih bae idak jero jero wong yang nak berejo ngedarke  narkoba, padahal ancaman hukuman untuk pengedar narkoba tu berat nian, sampe hukuman mati. La banyak pengedar narkoba yang divonis dengan hukuman mati, temasok yang sudah dieksekusi mati. Disamping itu la banyak pulok pengedar narkoba tu yang keno tembak plisi kareno cobo melarike diri waktu digrebek. Kareno aparat kepolisian dan jugo Badan Narkotika Nasional memang idak ngenjuk ampun untuk pengedar barang haram itu.

Pecak berita yang moncol di koran kiro baru baru ini, ado sepasang laki bini, wong Jawa Timur sano, yang tetingkep oleh Badan Narkotika Nasional (BNN) Sumatera Selatan, kareno berejo nak ngedarke paket narkotika jenis shabu seberat 4 kilogram. Wong duo belaki bini itu ditingkep di jalan Letjen harun Sohar, Kecamatan Sukarame Plembang. Barang bukti berupo 4 kilogram shabu disingitkenyo di dalem tas ransel yang dikemasnyo dalem 4 paket the Cino. Rencananyo  barang haram itu nak dikirimkenyo ke  wong yang sudah nunggu di Bandara Sultan Mahmud Badaruddin II Plembang untuk dibawak ke Bali.               

Cek Mamad temangak pecak wong bengak. Alangke  nekatnyo wong duo belaki bini itu. Apo dak kateik gawe lain  laju nak ngedarke shabu shabu tu. Apo kareno upah untuk ngirimke barang itu besak. Kareno amon maco beritanyo tu, upah wong duo belaki bini itu 200 juta. Mungkin gelep mato nyingok selawat citak sebanyak itu. Idak dipikirkenyo lagi segalo resiko yang bakal dihadapinyo amon tetingkep.  
Yang Cek Mamad idak habis pikir, ngapo nian wong wong ni masih galak nggunoke barang haram itu. Amon la tau kateik manfaatnyo, payu berentilah pulok nak makeknyo. Gunoke bae selawat citak tu untuk meli keperluan lain, apo meli baju, sepatu, sewet amon dak tu belike di pindang iwak delek. Soalnyo untuk mendapetke barang haram itu, pake selawat citak.

Berita Sejenis

Polsek SU II Palembang Ringkus 10 Preman

Dijambret, Mahasiswi Kehilangan Ponsel

Mangkir Latihan, Nasib Bio Diserahkan Kepelatih

1 daripada 3.095

Cek Mamad dewek idak pernah nyobonyo. Cuman yang Cek Mamad tau dari maco maco atau jugo dari cerito wong, akibat dari make barang haram itu, pacak nggawek wong tenggeng, setengah idak sadar. Pokoknyo pecak mabuk. Barang haram itu dewek pacak ngakibatke wong yang makenyo ketagihan. Nah, amon la ketagihan, dak pacak idak nak make tula. Akibatnyo amon dak kateik duit untuk melinyo, laju nganar dak tekeruan agok untuk mendapetkenyo. Idak nutup kemungkinan laju bebuat kriminal, pecak maling, nyambret, nodong atau jugo merampok.                

Kareno itu pulok, penting nian bagi wong tuo untuk ngawasi anaknyo, jangan sampe anak kito tu laju salah begaul. Kareno bukan idak mungkin, ado yang cobo cobo ngolo,i anak kito untuk nyobo barang haram itu. Soalnyo amon la tecobo sekali gek laju keterusan. Amon la ketagihan saro ngubatinyo.
Sudah itu jangan pelo,i gawe wong duo belaki bini  yang nekat jadi kurir pengiriman barang haram tu. Payu lemak berejo cari gawe lain bae.

Ye dak.
Palembang Juli 2017