PUASO

Tiap masuk bulan puaso selalu bae hargo kebutuhan bahan pokok jadi peratian pemerintah, kareno hargo hargo di pasar berejo nak naek galo. Mulai dari rego iwak sampe dengan rego daging, daging sapi, atau jugo daging ayam.

Cuma walau pun pecak itu masih bae di beli wong. Maklumlah di bulan puaso ni, banyak wong yang nak ningkatke selera. Yang idak biaso makan daging, berejo masak daging untuk buko atau jugo sahur. Yang idak biaso makan ayam, berejo nak nyembelih ayam untuk nyambut puaso.

Ngapo laju pecak itu, Cek Mamad idak terti igo. Yang jelas di bulan puaso ni, pasar pasar justru padet didatengi wong yang nak belanjo. Berimpit rimpit. Mulai dari budak kecik, budak mudo sampe dengan wong tuo. Pokoknyo berejo nak ke pasar galo. Amon dak percayo jingok la dewek di pasar pasar tradisional kito, pecak misalnyo pasar 16 ilir.

Biasonyo agak sore dikit la bekeliling pulok nak nyari bukoan. Kareno tiap bulan puaso muncul pasar ramadhan di segalo bucu, yang menjualke segalo macam jenis pajoan. Dari mulai lauk makan sampaike makanan kecik pecak pempek, burgo, laksan, martabak dan jugo segalo macem jenis es. Es buah, es dawet, es campur dan lain lain. La nak dibeli pulok.

Kagek pas nak bebuko segalo jenis pajuan tu betumpuk tumpuk dipucuk meja makan. Ado pindang, ikan goreng, ayam kalasan, rendang, sambel tempe, tahu ado jugo sayur asem dan jugo lalapan. Belum lagi pempek, tekwan, model, laksan, burgo, martabak, es cincau, es kacang, es dawet, kopi, teh dan entah apo dio lagi. Pokoknyo segalo pajuan ditaroke galo dipucuk meja. Berejolah.

Sambil nunggu buko biasonyo nonton acara yang paling ditunggu di tivi, adzan dan bedug magrib. Tecuguk di depan tivi cuman nak nunggu wong nabuhi bedug. Teseler pecak dan kuawo lagi nak begerak. Biasonyo tambah ditunggu pecak tambah lamo bae bedug tu ditabuh. Ado bae yang kula kilir keluar masok dari jabo ke buri cuma nak nyelik hidangan buko puaso. Pecak la dak tahan lagi nak mecahke puaso. Sampe sampe netes banyu iler dari selo mulut.

Kareno itu pulok, pas  bedug bebunyi langsung menculat ngadepi meja sambil cengkem es dawet. Bederrrup negok es dawet pecak la betaun idak minum. Dak terti lagi apo bedo’a dulu apo idak. Pokoknyo buko. Sesudah itu langsung ngelogok sok apo yang ado dipucuk meja.  Pokoknyo dijejel jejelke  ke jero mulut. Sesudah itu teseler kekenyangan, nak tegak bae lagi saro. Pecak ulo sawo habis makan sapi.  Sisip sisip sembahyang magrib teliwat, mak itu jugo dengan sembahyang tarawuih.
Cek Mamad cuma pacak berarep, mudah mudahan kito idak pecak itu.  

Kareno puaso tu bukan cuma nahanke laper samo haus bae, tapi yang lebih penting lagi nahanke hawo nafsu.  Mudah mudahan puaso taun ini pacak kito jalani lebih baek dari taun taun sebelumnyo. Paling idak amun  taun sebelumnyo masih ado batalnyo, taun ini pacak penuh. Amun taun kemaren masih sungkan shalat tarawih ke mesjid, taun ini mulai beguyur shalat tarawih ke mesjid dan jugo melok tadarusan.
Ye dak ?
Palembang Juni 2017