DAK JERO JERO

Pecaknyo masih bae idak jero jero wong yang nak berejo ngedarke  narkoba, padahal ancaman hukuman untuk pengedar narkoba tu berat nian, sampe hukuman mati. La banyak pengedar narkoba yang divonis dengan hukuman mati, temasok yang sudah dieksekusi mati. Disamping itu la banyak pulok pengedar narkoba tu yang keno tembak plisi kareno cobo melarike diri waktu digrebek. Kareno aparat kepolisian dan jugo Badan Narkotika Nasional memang idak ngenjuk ampun untuk pengedar barang haram itu.
Pecak berita yang moncol di koran kiro baru baru ini, ado gembong narkoba yang ditembak anggota plisi Polda Sumsel dan Badan Narkotika Nasional (BNN), kareno waktu digrebek masih berejo nak belari. Akibatnyo ado yang tega punah keno peluru panas.  Penggrebekan itu dewek dilakuke di daerah Talang Kramat, Kabupaten Banyuasin, Sumatera Selatan. Dalam penggerebekan itu dewek aparat plisi dan badan narkoba nasional bukan cuma berhasil melumpuhke gembongnyo, tapi jugo berhasil nyita 10 kg shabu shabu dan 6.000 ikok pil ekstasi.
                Cek Mamad temangak pecak wong bengak. Alangke nekat nekatnyo wong jadi pengedar narkoba tu, idak takut apo dengan ancaman hukuman berat. Sudah itu, idak tepikir apo di utaknyo tu, kalu akibat dari perbuatannyo tu pacak laju merusak generasi mudo. Soalnyo, amon maco di berita berita tu, ado bae yang berejo ngendalike peredaran narkoba dari jero obak. Ai, cacam, la keno penjaro kareno kasus narkoba masih bae berejo nak ngedarkenyo dari jero obak.
Yang nggawek utak Cek Mamad galak ngubeng dewek, pecak layangan putus tali timbo, ngapo nian wong wong ni masih galak nggunoke barang haram itu. Amon la tau kateik manfaatnyo, payu berentilah pulok nak makeknyo. Gunoke bae selawat citak tu meli keperluan lain, apo meli baju, sepatu, sewet amon dak tu belike di pindang iwak delek. Soalnyo untuk mendapetke barang haram itu, pake selawat citak.
                Cek Mamad dewek idak pernah nyobonyo. Cuman yang Cek Mamad tau, akibat dari make barang haram itu, pacak nggawek wong tenggeng, setengah idak sadar. Barang haram itu dewek pacak ngakibatke wong yang makenyo ketagihan. Nah, amon la ketagihan, dak pacak idak nak make tula. Akibatnyo amon dak kateik duit untuk melinyo, laju nganar dak tekeruan agok untuk mendapetkenyo. Idak nutup kemungkinan laju bebuat kriminal, pecak maling, nyambret, nodong atau jugo merampok.
                Kareno itu pulok, penting nian bagi wong tuo untuk ngawasi anaknyo, jangan sampe anak kito tu laju salah begaul. Kareno bukan idak mungkin, ado yang cobo cobo ngolo,i anak kito untuk nyobo barang haram itu. Soalnyo amon la tecobo sekali gek laju keterusan. Amon la ketagihan saro ngubatinyo.
Jadi pesen Cek Mamad, jangan nian pernah nyobo make narkoba. Nak jenis apo bae  
                Ye dak.
Palembang April 2017