NAK JADI PLISI

Ilustrasi

Romli anak Kak Cek Rojak nak tes masok plisi. Dan pecak biaso, anaknyo yang masok plisi yang siget justru abahnyo. Siget nyari duit dan jugo nyari dulur atau wong yang kiro kiro pacak nulung anaknyo supayo diterimo jadi plisi. Kareno adonyo selentingan, supayo pacak diterimo tu mesti ado yang nulung. Nah, wong yang nak nulung tu bukannyo nak nak nulung bae. Tapi mesti ado selawat citak untuk pelicinnyo.


Kareno itu pulok Kak Cek Rojak nemui Cek Mamad untuk mintak tulung nyarike wong yang kiro kiro pacak nulung anaknyo untuk jadi plisi. “Amon soal duit, aku sudah siap. Pokoknyo melok caro wong. Yang penting Romli pacak diterimo jadi plisi,”kato Kak Cek Rojak besemangat nian. “Soalnyo amon idak makek selawat citak kecik arepan pacak diterimo,”


Cek Mamad tediem dewek. Tepikir diutaknyo, berapo banyak nian wong tuo yang samo pikirannyo dengan Kak Cek Rojak, yang berejo dengan segalo caro untuk pacak masoke anaknyo jadi anggota plisi. Akibat dari sikap pecak itulah moncol pulok wong wong yang idak betanggung jawab, yang selo dak selo nanggo’i duitnyo. Amon omongannyo nak nulung. Tapi dak tau ditulungnyo nian apo idak.


“Aku ni memang tukang ulo. Tapi dak pernah nguloke wong yang nak masok plisi. Gawe pecak itu bener. Bahayo. Sudah itu beresiko. Makmano kalu duit la dienjuke tapi budak tu masih jugo idak diterimo. Ilang bae duit tu. Bukan idak mungkin wong tu masang tajur. Lemak melok secaro bebeneran bae,”kato Cek Mamad.


“Ui, Mad. Amon nak melok secaro bebener, aku idak berejo nak nemui kau. Lagi pulok, aku bukan nak mintak tulung dengan kau. Tapi minta tulung carike wong yang pacak nulung,”simbat Kak Cek Rojak.


Kareno barusan bae maco berita di koran kito, soal kecurangan penerimoan angota Polri, dimano di koran kito tu dijelaske kalu Polda Sumsel lagi dibelit kasus pungli yang nyeret sejumlah pejabat Polda Sumsel di bidang Kedokteran  dan Kesehatan atau jugo Bidokkes.  Dan jugo menurut berita yang dibaconyo tu,Propam Mabes Polri dan Polda Sumsel la nyita duit sebanyak 6,7 milyar yang didugo kuat merupoke hasil pungli penerimoan calon bintara Polri taun 2016. Dan pejabat yang telibat dengan kasus ini dewek khabarnyo pulok sudak ditindak.


Cek Mamad ngenjuke koran kito yang baru dibaconyo, dan dikongkonnyo Kak Cek Rojak untuk maco beritanyo.  Sesudah maco berita itu, giliran Kak Cek Rojak pulok tediem. Bingung dewek nak ngomong apo. Kalu yang telibat sudah ditindak galo, nak mintak tulung dengan siapo pulok lagi, pikirnyo.


“Pelo’i bae secaro bener dan sesuai aturan. Amon budak tu memang memenuhi syarat, cengki diterimo ,” kato Cek Mamad cobo meyakinke Kak Cek Rojak.
Kak Cek Rojak manggut manggut. Mudah mudahan bae dio setuju dengan saran Cek Mamad.  Ye dak.
Palembang, April 2017