REZEKI

Ilustrasi

Yang namonyo begawe tu cengki untuk nyari duit atau selawat citak. Apo dan jugo dimano bae tempat gawean. Nak dio begawe di kantor, pemerintah atau jugo swasta,  begawe jadi sopir, kenek, tukang ojek, kuli, tukang ulo, bejualan di toko atau jugo di warung dan lain lainnyo. Kareno begawe untuk nyari duit, jadi galak dak galak mesti semangat. Apo lagi yang begawe bukan ngarepke gaji bulanan. Pecak bejualan, nyupir, ngojek, jadi tukang ulo dak pacak nak nyantai nyantai bae. Lokak dapur dak berasep.

Pecak jadi tukang ulo bae misalnyo, amon gawenyo banyaklah nyantai, banyaklah tiduk bae, cengki yang cuma dio dapetke taik mato bae. Yang namonyo nyari duit mesti nak semangat, segalo selo dan jugo bucu nak diawai nian. Kareno rejeki tu  idak pecak itu bae bedepuk turun dari langit. Mesti nak diperjuangke.


Pecak itu jugo dengan supir, sopir bus, oplet atau jugo taxi, amon gawenyo nyantai bae mano bakalan dapet penumpang. Cuman walaupun semangat, jangan pulok laju menghalalke segalo caro. Laju nak ngebut sekendaknyo dewek di jalan rayo, idak lagi mikirke keselematan diri dewek dan jugo wong banyak. Yang model pecak itu la idak akor pulok.


Sudah itu kito mesti percayo amon yang namonyo rejeki tu sudah ado yang ngatur. Amon bukan rezeki kito, mugolah  kito nak jungkir balik ngejokenyo masih dak dapet di kito tulah. Amon uji kawan Cek Mamad, Mang Arif, rejeki macan idak bakal tetuker dengan rejeki elang. Yang penting kito jangan putus asa. Pokoknyo berejo terus nyari rejeki.


Nah, mak ini ari, sering kito denger atau kito jingok di tivi berita sopir angkot atau jugo taxi bebala dengan sopir atau jugo ojek on line, yang manfaatke teknologi informasi untuk nyari penumpang.  Dimano penumpang amon nak manfaatke jasanyo tinggal nelpon bae. Akibatnyo banyak penumpang manfaatke jasa taxi dan ojek on line. Lebih cepet dan jugo khabarnyo lebih murah. Akibatnyo sopir angkot dan taxi lainnyo meraso tesaingi.


Kareno meraso tesaingi. Rejeki laju bekurang pulok. Laju sereik ati. Kareno sereik ati laju ujung ujungnyo ngajak bebala. Segalo sopir yang on line, temasok ojek, laju dirazia, digebuki, digoco, diterajangke. Sopir yang on line dewek, cengki bae melawan. Akibatnyo laju runyam.


Yang model pecak itu, menurut Cek Mamad idak akor. Idak seharusnyo pecak itu. Yang namonyo besaing, mesti manfaatke segalo kemungkinan yang ado temasok jugo teknologi yang sedang bekembang. Jadi mestinyo, berejo pulok untuk manfaatke teknologi informasi untuk pacak dapetke penumpang, Sudah itu pelayanan mesti ditingkatke pulok, mangke wong yang manfaatke jasa kito meraso puas dan jugo nyaman.


Cek Mamad dewek, nyadari nian  kalu dengan manfaatke teknologi informasi, kito pacak dapet informasi sebanyak banyaknyo dan jugo seluas luasnyo. Soalnyo amon ketinggalan informasi, ado lokak ketinggalan rezeki.
Ye dak.
Palembang, Maret 2017