R A J O

Ilustrasi


Alangke lemaknyo jadi Rajo. Segalonyo ado dan tesedio. Mulai dari istanah yang cindo  jugo luas dan lengkap dengan segalo fasilitas yang mewah, temasok wong wong selalu siap sedio melayani. Nak kemano mano selalu bae dijago oleh dan jugo dilayani. Amon liwat segalo wong tetunduk hormat. Rajo tu nguasoi pemerintahan di negaranyo, jadi segalo omongannyo didengerke wong dan dituruti wong. Apo yang dio omongke pacak jadi aturan.


Nah, tanggal 1 sampe dengan 9 Maret taun 2017 ini, rencanonyo Rajo Arab Saudi Salman bin Abdulaziz yang nak dateng ke Indonesia. Rencanonyo dio jugo belibur ke pulai Bali. Khabarnyo wong yang nak diajak untuk ngiringinyo dari arab saudi sano lebih kurang 1500 wong, temasok 10 mentri dan 25 pangeran.

 
Amon maco berita di koran dan jugo tivi, fasilitasnyo untuk ke Indonesia tu super mewah galo. Mulai dari pesawat yang nak nggawaknyo ke Indonesia, yang merupoke pesawat super mewah, dimano ruangan di dalem pesawat tu bae pecak kamar hotel mewah.

Sudah itu dio jugo mesen kamar hotel super mewah yang rego sewonyo pacak ratusan juta semalem, temasok jugo nggawak mobil khusus super mewah yang anti peluru sampe tanggo khusus untuk dio turun dari pesawat kagek.
Indonesia dewek khabarnyo mulai sibuk jugo ngadoke persiapan untuk nyambut kedatengannyo, terutamo nian nyiap personel untuk pengamanan Rajo Arab tu selamo dio bekunjung ke Indonesia, ado lebih kurang 10.000 anggota Polri dan jugo TNI yang disiapke. Belum lagi ratusan mobil mewah.


Kunjungan Rajo Arab Saudi Salman bin Abdulaziz Al Saud ke Indonesia merupoke kunjungan rajo Arab yang ke duo, kareno 47 taun yang liwat Indonesia jugo pernah dikunjungi oleh Rajo Arab Saudi FaisalIbnu Abdul Aziz As Saud. Dalem kunjungannyo ke Indonesia tu kagek, Rajo Arab Saudi bakal ngadiri pertemuan kenegaraan dengan Presiden Indonesia.


Khabarnyo ado beberapo topik yang nak dibahas oleh ke duo kepala Negara tu, diantaronyo penambahan kuoto haji, peningkatan wisatawan dari timur tengah dan jugo beberapo kerjo samo, temasok investasi Saudi Arabia di beberapo perusahaan.


Arepan Cek Mamad, mudah mudahan kunjungan kerjo Rajo Arab di Indonesia tu bejalan dengan lancar dan jugo aman, sehinggo Rajo Arab dengan rombongannyo meraso nyaman selamo berado di Indonesia dan kepengen ngulang lagi ngunjungi Indonesia.


Mudah mudahan pulok dengan kunjungan Rajo Arab Saudi tu, kuoto jemaah haji kito pacak betambah. Sehinggo dengan pecak kalu nak nak naek haji idak lamo igo nunggungo.  Idak sampe 10 atau jugo 15 taun.
Mudah mudahan. Ye dak.
Palembang, Maret 2017