Cek Nurul

ilustrasi

Ai, siapo nian cewek itu, kato Cek Mamad betanyo dalem ati. Waktu nyingok ado cewek yang sedang nyium tangan iboknyo di dalem halaman rumahnyo. Sesudah nyium tangan iboknyo dengan hormat, cewek itu naek motornyo dan melaju pegi ninggalke halaman rumahnyo.

Walau pun cuma sekali liwat, Cek Mamad sempet masati rai cewek itu. Amon dienjuk nilai jelas lebih dari 6, pacak bae 6,7. Artinyo masih dipucuk Cek Lela. Cuma siapo nian cewek itu, selamo ini belum pernah Cek Mamad nyeleiknyo.
Cek Mamad mara’i iboknyo. Sementaro kepalaknyomasih tetoleh nyingok arah motor cewek itu tadi. Iboknyo mesem bae nyingok tingkah Cek Mamad. Pikirnyo, jangan dak icul bae kepalak tu. Pecak siru nian noleh tu.
“Siapo, bok,”tanyo Cek Mamad sambil nyium tangan iboknyo dengan hormat.
“Cek Nurul,”simbat iboknyo.
Cek Mamad tekejut nenger jabawan iboknyo. Bukan apo apo, kareno beberapo bulan yang liwat iboknyo pernah nak njodohkenyo dengan cewek yang namonyo Cek Nurul. Apo Cek Nurul inilah yang nak dijodohke iboknyo. Amon memang bener Cek Nurul inilah, nah nyesel nian dio la nolak tawaran iboknyo tempo ari.
Apo lagi hubungannyo dengan Cek Lela tambah idak jelas bae.  Diomongke dak galak tapi pecaknyo galak. Diomongke galak tapi pecak dak dak galak. Nah, pening jadinyo kepalak. Tambah lamo laju pecak meraso tambah belagak bae. Kendaan Cek Mamad, amon galak caro galak amon nandak caro nandak.
Bukan apo apo, umur Cek Mamad la nak masok 35 taon. Abah iboknyo la nak tiap ari bae nanyoke calon mantu. Pokoknyo selo dak selo nanyoke calon mantu tula. Mungkin kareno la kemale’an nanyo, tapi dak kateik jawaban pasti dari Cek Mamad. Akhirnyo abah iboknyo njodohkenyo dengan Cek Nurul.
Cuman Cek Mamad nolak mentah mentah tawaran iboknyo tu. Padahal dio belum nyingok makmano nian bentuk raid an tingkah lakunyo. Uji Cek Mamad, dio la ado calon bini. Arepannyo tu kateik lain  Cek Lela tu.  Tapi sampek mak ini ari Cek Lela masih bae agak igik, cak galak cak idak. Nah, mak mano nian itu.
“Cek Nurul itu kan pernah nak ibok jodohke dengan kau Mad. Dio tu masih ado bau bau dulur dengan kito. Abah iboknyo la setuju. Cek Nurul dewek sebenernyo nurut bae kendaan abah iboknyo. Tapi kau dak galak,”uji iboknyo dengan agak kesel.”Nah, barusan bae dio nganterke undangan. Minggu depan dio nak kawin,” tambah iboknyo sambil ngenjuke undangan perkawinan ke Cek Mamad.
Cek Mamad temangak pecak wong bengak. Masati undangan perkawinan dari Cek Nurul.