Bisa Dipercaya

BOLA KAKI

ilustrasi

korankito.com- Cek Mamad hobby main bola kaki sejak dio kecik. Dari mulai belajar nendangi bola pelastik,  maen bola di jalan sampe pacak main bola di lapangan sepak bola nian. Amon melok betanding dari kampung ke kampung tu la neman nian. Pecak itu jugo di sekolahnyo. Sejak es em pe sampe es em a dio selalu bae diajak untuk memperkuat tim sekolahnyo.

Posisi Cek Mamad selalu bae jadi penyerang. Selain dari jadi penyerang dio dak galak. Kareno dio maen bola tu nak nyetak gol ke gawang tula. Umur 15 atau 16 taun mungkin merupoke umur keemasan Cek Mamad. Waktu itu banyak yang nyangko kalu suatu saat kagek Cek Mamad bakalan pacak jadi pemain nasional.

Berita Sejenis
1 daripada 3.082

Cek Mamad dewek memang sempet punyo cito cito dan arepan untuk kageknyo pacak jadi pemain sepakbola professional. Tapi yang namonyo nasib kateik yang pacak didugo. Dalem pertandingan antar kampung, kakinyo keno pangkah oleh lawan. Meliting liting Cek Mamad nahanke sakit. Ruponyo kakinyo patah, karenonyo dio dak pacak neruske pertandingan.

Baliknyo diurut oleh tukang urut patah. Cuman sesudah sembuh, kakinyo dak pacak sekuat dulu lagi.  Sejak saat itu pulok dio ngubur dalem dalem cita citanyo untuk jadi pemain sepak bola. Cuma  kecintoannyo dengan sepak bola dak pernah luntur. Makonyo kalu ado pertandingan sepakbola di Jakabaring, terutamo nian kalu Sriwijaya FC yang maen selo dak selo dio nak nonton. Soalnyo amon nonton bola kaki tu semangatnyo pecak moncol lagi.

Apo lagi amon nenger tim Indonesia nak betanding dengan tim negara lain, berejo rejo dio nyari tivi yang lokak nyiarke langsung pertandingan itu. Amon la tau, tecungkuk dio nyuguk di depan tivi nunggui pertandingan. Pecak itu pulok dengan pertandingan semi final piala AFF antaro Indonesia lawan Vietnam. Dari sore Cek Mamad la tecuguk di depan tivi.

Waktu pertandingan  dimulai matonyo dak bekedip melok kemano bola keno tending. Kadang ngoceh dewek, nepuk kening dewek atau jugo ngenggemke tangan kalu pemain kito pacak mudike lawan. Amon pemain kito pacak ngegolke gawang lawan, dak urung dio tepekik dewek dengan perasaan seneng.

Malem itu tim sepak bola Indonesia memang besemangat nian nak menang. Apo lagi, Presiden kito, Joko Widodo nonton langsung pertandingan semi final itu. Tambah semangat bae pemain pemain kito bejuang nak ngalahke Vietnam. Dan berkat semangat juang yang tinggi tim Indonesia akhirnyo pacak ngalahke Vietnam 2-1.

Cuman masih ado pertandingan tandang di Vietnam. Amon kito pacak nahan Vietnam seri bae, kito yang masok final piala AFF. Kito do’ake samo samo supayo kageknyo pemain pemain Indonesia bukan cuma pacak nahan seri bae tapi jugo pacak ngalahke Vietnam lagi. Dan jugo bukan cuma sekedar masok final bae. Kalu pacak ejoke jadi juara AFF. Ye dak  (korankito.com/***)