Bisa Dipercaya

R  A  Z  I  A

ilustrasi

korankito.com- Kadang kadang tepikir jugo diutak Cek Mamad untuk punyo mobil pribadi. Soalnyo la puluhan taun dio bemotor. Amon beganti motor ni la dak te itung kali. Kalu la nak ribuan kali. Caro tukang ulo, amon ado yang naksir dengan motornyo dan hargonyo cocok lajulah itu dijualkenyo. Tinggal berejo pulok nyari motor lain.

Rasonyo amon yang namonyo bemotor tu la  temalak malak.  Amon ari ujan keujanan, amon ari panas kepanasan pulok. Sisip sisip amon liwat di jalan becek, banyu becek tu laju mercik ke pakaian pulok.  Cuma nak makmano lagi, kareno sampe ari ini Cek Mamad belum tau makmano nian caronyo supayo pacak punyo mobil.  Apo lagi amon nyingok rego mobil tu dewek. Angko nol yang ado di selawat citak tu minal 7 ikok, sisip sisip 8 ikok. Yang jadi pikiran Cek Mamad, makmano nian wong sampe punyo mobil 3 atau jugo 5 ikok. Alangke banyak selawat citak yang disimpen di jero gerobok tu.

Berita Sejenis
1 daripada 3.093

Lagi mikirke selawat citak pecak itu, tibo tibo di depannyo banyak nian pelisi lalu lintas yang lagi nyetopi wong bemotor. Cek Mamad baru sadar kalu lagi ado razia.  Cuman kareno meraso surat menyuratnyo lengkap dio tenang tenang bae. Pikirnyo, ngapo laju nak takut.
Yang galak laju pucet dan jugo gugup amon nyingok ado razia tu, wong yang meraso besalah. Pecak misalnyo bae idak punyo stnk atau jugo idak punyo sim. Yang pecak itu amon nyingok ado razia, biasonyo berejo rejo nak ngindar. Amon masih jaoh, berejo nekat bebalik arah untuk melarike diri. Dak tepikir diutaknyo gawe model pacak nimbulke bahayo kecelakaan.

Yang namonyo nggawak surat surat lengkap sebelum makek motor atau jugo mobil tu merupoke kewajiban kito sebagai pengemudi. Sudah itu la jadi tugas plisi jugo untuk nanyoke kelengkapan surat menyurat kalu kito melanggar rambu rambu lalu lintas dan atau sedang ngadoke razio. Temasok melaku tilang, kalu surat menyurat ternyato idak lengkap. Kito idak usah proses, apo lagi berasan berejo minta dilepaske.

Mangkonyo waktu plisi ngongkon Cek Mamad minggir, dan terus nanyo surat menyurat motornyo, sikok sikok diambeknyo dari kelepe dan ditunjukenyo ke plisi. Sesudah dipasati plisi itu sikok sikok dibalikenyo lagi dan Cek Mamad dikongkonnyo untuk melanjutke perjalanan.

Arepan Cek Mamad mudah mudahan sebelum make kendaraan bemotor, kito selalu siap siago dengan surat menyurat kendaraan itu dewek. Sudah itu patuh dengan segalo aturan rambu rambu lalu lintas. Amon ado larangan tando idak boleh masok, jangan pulok masok. Amon ado tando dilarang berenti jangan pulok berenti.

Sudah itu jangan pulok galak melanggar lampu abang. Amon lampu tu sudah abang jangan pulok diterobos. Bahayo gawe tu. Bukan Cuma membahayoke keselamatan diri kito bae, tapi jugo membahayoke keselamatan pemakai jalan rayo lainnyo. Kareno  melanggar lampu abang pacak jadi penyebab kecelakaan lalu lintas.
Ye dak (korankito.com/***)