Bisa Dipercaya

Maen Sandiwara

 

ilustrasi

Korankito.com- Beberapo ari belakangan ini Bik Zenab jadi agak bingsal dewek nyingok tingkah anaknyo, Ciknang. Kareno Ciknang mulai galak ngomong dewek. Terutamo nian kalu lagi di kamarnyo. Amon di dengerke nian omongannyo tu, pecak lagi merayu betino. Nah, ngapo budak sikok ini, pikir ati Bik Zenab. Lagi jatuh cinto apo makmano.

Berita Sejenis
1 daripada 3.098

La nak lebih dari 3 kali Bik Zenab negorke Ciknang supayo jangan galak ngomong dewek tu. Cuma masih bae idak berubah.  Pening dewek kepalak Bik Zenab nyingok tingkah anak bujangnyo. La tepikir di utaknyo untuk nggawak Ciknang ke rumah sakit jiwo. Mintak periksoke ke dokter, ngapo nian anaknyo galak ngomong dewek pecak itu. Kalu nian ado urat diutaknyo tu yang putus.

Amon dak ke dokter, Bik Zenab la tepikir jugo untuk nyari wong pinter alias dukun. Siapo tau anaknyo tu ketenggoran amun dak tu keno guno guno. Nah, yang banyak kenal dengan wong pinter tu Cek Mamad. Laju diundangnyolah Cek Mamad ke rumahnyo untuk ngomongke soal Ciknang.

Waktu Cek Mamad dateng ke rumahnyo, kebetulan nian Ciknang tu lagi kumat. Ngomong dewek di kamarnyo. Nah, cobo jingoklah gawe keponakan kau tu. Ngapo laju jadi pecak itu, kato Bi Zenab. Cek Mamad marak ke kamar Ciknang, nengerke apo dio nian yang diocehke oleh Ciknang. Cek Mamad cengah cengeh dewek nengerkenyo.

“Pecaknyo, dio tu lagi latihan sandiwara, yuk,”kato Cek Mamad. Cuma Bi Zenab masih idak percayo dengan omongan Cek Mamad. Dak ke ado nian rai pecak Ciknang tu pacak melok maen sandiwara, uji Bik Zenab.

Supayo Bik Zenab tenang dan percayo, Cek Mamad minta Ciknang untuk menjelaske sejelas jelasnyo, apo dio nian gawenyo galak ngomong dewek tu.

“La nemen kuomongke dengan ebok tu amon aku ni latian sandiwara. Dasar ibok bae dak percayo,”uji Ciknang dengan agak kesel. “Aku ni melok teater di sekolah. Dan rencanonyo kami nak mentas di taman budaya sriwijaya. Amon masih idak percayo nonton. Cuma meli karcis,”

Memang Cek Mamad pernah ado nenger khabar, kalu mak ini ari ampir setiap minggu ado kegiatan kesenian di taman budaya kito tu, mulai dari pertunjukan teater, lukis, tari dan jugo nyanyi. Yang ngisinyo seniman seniman kito plembang ni, mahasiswa dan jugo pelajar yang aktif bekesenian.

Pas ari pertunjukannyo, Cek Mamad disuruh Bik Zenab untuk nonton. Alesannyo mangko dio yakin nian, amon anaknyo memang lagi nak melok pertunjukan teater, bukannyo lagi nak stress. Kareno itu pulok pegilah Cek Mamad ngarahke motornyo ke Jaka Baring. Tujuannyo nak ke Taman Budaya Sriwijaya yang letaknyo ado di daerah Jaka Baring, tepatnyo nian di jalan Seniman Amri Yahya. Bepara’an bae dengan Dekranasda.

Cuman pas meliwati jalan Seniman Amri Yahya tu, alangke banyaknyo lubang. Dalem dalem pulok. Amon motor masih pacak jugo berejo rejo, amon mobil saro. Kareno itu pulok ado beberapo mobil dan motor yang nekat melawan arus, nyari jalan bagus. Cek Mamad nandak melanggar aturan. Pikirnyo, amon ado plisi dak urung keno tingkep tula.

Arepan Cek Mamad, ado peratian dari pemerintah supayo pacak meneri jalan yang rusak tu. Mangko idak saro igo masyarakat yang liwak sano.
Ye dak (korankito.com/***)