Bisa Dipercaya

Pilkada Serentak

ilustrasi

Korankito.com- Awal taun 2017 ini, tepatnyo tanggal 15 Februari 2017     gek,  bakal diramike lagi dengan pemilihan Kepala Daerah secaro serentak di seluruh Indonesia. Pilkada itu dewek dipelo’i oleh 101 daerah dari tingkat provinsi, kabupaten dan jugo kota. Ado 7 provinsi, 76 kabupaten dan 18 kota. 7 provinsi yang bakal milih gubernur tu Aceh, Bangka Belitung, DKI Jakarta, Banten, Gorontalo, Sulawesi Barat dan jugo Papua Barat.

Yang paling siru cengki bae pemilihan Gubernur/Wakil Gubernur DKI Jakarta. Maklum bae kareno DKI Jakarta tu ibu kota Indonesia. Disamping itu pulok segalo media koran, radio, tv, media on line dan jugo media sosial dak berenti lagi nyampeke beritanyo. Apo lagi salah sikok calonnyo, yang merupoke petahana, lagi tesandung dengan masalah penistaan agama. Jadinyo tambah rami.
Di Sumatera Selatan dewek taun 2017 ini cuma ado sikok kabupaten yang nak melaksanoke pemilihan kepala daerah, iyolah Kabupaten Musi Banyuasin alias Muba. Pilkada di Muba itu dewek  dipelo’i oleh duo pasang calon, pasangan Dodi Reza Alex dengan Beni Hernedi yang didukung oleh 11 partai politik dan jugo Amirul Arifin dan Ahmad Toha dari jalur independen.
               
Siapo nian yang bakalan tepilih jadi Gubernur/Wakil Gubernur, Bupati/Wakil Bupati, Walikota/Wakil Walikota penentuannyo cengki bae ditangan rakyat yang nak milihnyo gek di tanggal 15 Februari. Amon mak ini ari segalo calon tu lagi siru kampanye, ngolo’i rakyat supayo galak milih dio. Cengki bae ngolo’i dengan program kerjo dan idak lupo janji janji manis.
Biasonyo pasangan calon sudah nyiapke tim sukses yang bakalan membantunyo untuk memuluske jalannyo memenangke Pilkada.  Biasonyo yang namonyo tim sukses tu sudah mulai sibuk dari mulai awal pencalonan, dan tambah sibuk lagi pada maso maso kampanye. Pokoknyo berejo rejo makmano caronyo jagoannyo kagek pacak dapet suaro paling banyak, sehinggo dengan mak itu jagoannyo jadi pemenang.  
Cek Mamad temasok seneng melo’i berita berita soal pilkada, baek lewat tivi, koran, radio atau jugo media on line. Bukan cuma Pilkada Dki Jakarta bae, temasok jugo pilkada yang nak diadoke di Kabupaten Musi Banyuasin. Bukan apo apo, kagek amon ado kawannyo ngajak nomong soal pilkada, paling idak dio ado bahan untuk diomongke.
Arepan Cek Mamad  supayo pelaksanaan pilkada serentak tu kageknyo  bejalan dengan baek bener dan lancar, kateik yang main sekiwit. Idak retok apo lagi laju sampe bebala.  
Dengan pecak itu kageknyo yang tepilih tu memang bener bener pilihan rakyat, dan bener bener bejuang untuk membangun dan mensejahterahke rakyatnyo.
Dan rakyat mesti bebener nian nentuke pilihan untuk calon pemimpinnyo. Jangan asal pilih bae. Pilih yang memang punyo kualitas dan yang punyo program pembangunan yang jelas, bukan yang cuma sekedar jual janji janji bae. Jangan sampe salah pilih.
Ye dak
Palembang Januari 2017
(korankito.com/***)