Bingsal

ilustrasi

Cek Mamad mulai bingsal nyingok motor yang ngiringi motornyo. Perasaannyo dari tadi motor itu ngiringinyo terus. Cek Mamad belok kanan, motor itu melok belok kanan. Cek Mamad belok kiri, motor itu jugo belok ke kiri. Ai, apo dio nian kendak bundak itu. Kareno bingsal dijingoknyo  lewat kaco sepion. Budak yang nggawak motor itu tetutup rainyo oleh helm. Pecak itu jugo budak yang diboncengnyo.

Amon dio nak nodong apo dio nak ditodongnyo. Duit yang ado di kantong Cek Mamad paling cuma 7875 repiah. Cuman makmano amon dio nak ngambek motor. Mak ini ari kan jaman wong galak begal motor. Nah, tambah bingsal Cek Mamad. Apo lagi amun maco berita, begal motor tu dak segen segen melukoi korbannyo.
Sudah tu sasarannyo, siapo bae laju. Budak sekolah, budak kuliah, bujang gadis, tuo mudo, lanang betino lanjakenyo amon ado kesempatan. La banyak beritanyo wong yang keno begal motor. Wongnyo dilukoi, motornyo diambek. Plisi dewek la nemen jugo nangkepi begal motor tu. Ado bae yang tepakso ditembak plisi kakinyo, kareno melawan. Cuma pecak idak abis abis. Keno tingkep duo, nongol lagi tigo.
Cek Mamad tambah bingsal bae. Apo lagi kareno ari mulai dalu, jalan mulai sepi. Rumah rumah di kiri kanan jalan la nutup galo. Mobil atau jugo motor la jarang nian liwat.  Pikirnyo, amun tejadi apo apo malem ini, kateik yang pacak nulung kecuali dirinyo dewek. Memang dulu dio pernah belajar pencak plembang. Cuma yang diadepinyo ini, wong duo. Cengki nggawak senjato, amon dak lading, golok.  Ai, lokak saro gawe ni, pikirnyo.
Bekali kali kepalaknyo noleh ke belakang, ngawasi ringgak budak di motor belakangnyo. Takut kalu tibo tibo budak yang bemotor di belakangnyo tu ngapak atau nujah.  Apo nelpon pelisi bae, pikirnyo. Cuma berapo nian nomor telponnyo Cek Mamad dak pulok tau. Nah, gawat gawe ni pikirnyo.
Kareno nemen igo noleh ke belakang, Cek Mamad dak nyingok amun jalan di depannyo ado lubang. Akibatnyo motornyo tejungkel. Cek Mamad dewek teduduk. Tapi begancang dio tegak. Sudah tu  negakke motornyo yang tebalik.
Sementaro motor yang ngiringinyo tadi berenti di deketnyo. Dan Cek Mamad tekejut waktu masati wong duo yang turun dari motor itu. Ternyato wong duo itu anggota plisi yang lagi patroli. Cek Mamad ditolonginyo. Sesudah nyingok keadaan Cek Mamad baek baek bae, motornyo jugo idak rusak, Cek Mamad sempet ditanyoi beberapo pertanyaan oleh keduo plisi itu.
Cek Mamad jadi manyun dewek sesudah keduo plisi itu pegi untuk melanjuti patroli. Baru sadar Cek Mamad ngapo  nian tadi diiringi oleh motor yang ternyato anggota plisi. Jangan jangan plisi itu jugo curiga dengan ringgak Cek Mamad.
Ye dak. Mang Kodir