Bisa Dipercaya

Ujung Taun 2016

Taun 2016 la nak abis, denget lagi kito bakalan masok di taun 2017. Arepan segalo wong cengkinyo taun depan lebih baek dari taun sebelumnyo. Yang belum punyo gawe, berarep kalu nian taun depan bakalan punyo gawe. Yang belum bebini atau jugo belaki, berarep kalo nian taun depan dapet laki atau jugo bini. Pecak itu jugo yang la lamo begawe, cengki berarep jugo supayo taun depan nasibnyo lebih baek lagi.

Disamping itu setiap pengujung taun, biasonyo wong punyo rencana dewek dewek. Ado yang merayoke dengan keluargonyo sambil nunu jagung, makan model, tekwan atau pempek. Ado jugo yang sokongan ngundang orgen tunggal di kampungnyo. Ado jugo yang merayokenyo di hotel hotel yang biasonyo galak ngundang artis artis ibu kota. Atau jugo melok meramike acara acara yang memang disiapke pemerintah untuk masyarakat umum. Amon di plembang biasonyo acara taun baru galak diadoke di sekitaran benteng kuto besak. Di sano gek ado panggung hiburan yang nampilke artis artis lokal atau jugo artis artis ibu kota. Pas tengah dalu gek biasonyo ado pesta kembang api.

Idak sedikit pulok yang merencanoke acara taun baru dengan ngajak keluargonyo untuk belibur keluar kota dengan caro naek bus, sepur, kapal laut, kapal terbang atau jugo mobil pribadi temasok yang nekat nggawak mobil dinas.  Biasonyo yang jadi tujuan untuk dikunjungi tu tempat tempat wisata. Kalu la model pecak itu, dak urung mobil mobil jadi betumpuk di jalan nak nuju ke tempat wisata. Akibatnyo cengki bae jalan jadi macet panjang. Galak dak galak plisi lalu lintas jadi sibuk ngatur jalan.

Alangke lemak wong yang punyo selawat citak, kato ati Cek Mamad. Pacak ngajak keluargonyo belibur. Sementaro wong pecak Cek Mamad yang punyo waktu luas amun nak bejalan, saro nian nak liburan tu. Bukan apo apo, kareno dak kateik selawat citak. Amun ado selawat citak cengki idak nak nungguke taun baru igo.

Rencananyo Cek Mamad nak ngajak Cek Lela untuk merayoke malem taun baru di Benteng Kuto Besak bae. Kalu nian di malem taun baru tu, ati Cek Lela tebukak libar. Pacak merencanoke hubungan yang lebih baek lagi di taun depan. Cuman sayangnyo, Cek Lela la ado rencano lain pulok. Dio berencano nak mudik ke dusunnyo, nak merayoke taun baru dengan keluargo di dusunnyo sano.

Nah, tambah cugak bae Cek Mamad. Amon la model pecak itu lokak taun ini kedewe’an lagi pecak taun taun sebelumnyo. Cuma nak diapoke, memang pecak itulah adonyo. Dak pacak jugo nak dipaksoke. Yang jelas taun depan umur Cek Mamad bakal betambah setaun lagi, dengan status tetep bae jadi bujang tuo.

Tapi makmano jugo Cek Mamad tetep bepikiran positif, berarep taun depan nasib kito galo galo, terutamo pembaco korkit,  lebih baek lagi dari taun ini dan taun taun sebelumnyo.

Mudah mudahan bae. Ye dak.
Palembang desember 2016
Berita Sejenis

Tim Satgas Lubuklinggau Cek Stok Jelang Natal

Temani Cari Ponsel, Pelajar SMA Diperkosa

Asah Otak Sebelum Tumpul

1 daripada 3.080