Bisa Dipercaya

Haji

Amun nyingokke gawe Mang Ujang yang cuma bejualan model dengan gerobak dorong, banyak yang dak percayo amun dia pacak naek haji. Soalnyo wong tu cuma ngitung berapo besak nian penghasilannyo dari bejualan model  dengan gerobak dorong tu. Wong wong tu idak ngitung amun Mang Ujang, ampir nak setiap ari nyisihke duit keuntungannyo dari bejualan tu betaun taun dengan niat untuk melaksanoke ibadah haji. Kalo lebih dari 15 taun dio beguyur nyimpeni duit keuntungannyo bejualan model tu. Dan Alhamdulillah, taun ini dio melok jugo naek haji.

Memang Mang Ujang temasok wong alim yang dak pernah ninggalke shalat. Amun lagi bejualan, dan dateng waktu shalat, Mang Ujang berejo dulu nutup jualan untuk shalat dikin di  mesjid.  Di kampung dewek Mang Ujang temasok wong yang rajin ibadah. Jadi wajar kalu pas dio nak berangkat haji, banyak nian wong di kampung tu melok nak nganterke dio ke bandara.

Apo yang sudah dilakuke Mang Ujang, galak dak galak mukake mato wong. Istilahnyo tu, amun ado niat dan galak berusaha, pecak nabung misalnyo, kateik yang idak mungkin. Amun uji yai Cek Mamad bingen, yang namonyo ibadah haji tu panggilan Allah. Amun memang ado panggilan, ado bae jalan.  Cuman segalo gawe tu nak niat dikin. Amun niat bae lagi dak kateik makmano pacak nak berangkat nunaike ibadah haji, mugolah selawat citak di celengan penuh, reto bendo ado dimano mano.

Berita Sejenis
1 daripada 6

Cek Mamad laju teringet dengan 177 wong Indonesia yang nekat naek haji lewat Filipina, dengan nggunoke paspor Filipina. Khabarnyo wong wong itu mak ini ari laju ditahan oleh pemerintah Filipina sano, kareno sudah nggunoke paspor palsu. Makmano nian pulok wong Indonesia laju pacak dapet paspor Filipina. Gawe model pecak itu biasonyo ado tukang ngolo’inyo yang sengajo manfaatke keinginan wong untuk pacak cepet naek haji. Kareno amun nak nunggu mungkin pacak sampe 6 atau jugo 7 taun lagi, soalnyo kuota haji kito Indonesia ni tebatas.

Caro wong yang ngolo’i, cengki segalo caro digunokenyo untuk pacak nggawek wong percayo. Temasok jugo janji janji manis semanis gulo. Akibat temakan olo’an, laju ilang galo pikiran waras.  Dak terti amon gawe pecak itu idak dibolehke.  Pokoknyo makmano caronyo nak gancang pacak melok naek haji.

Amun sudah keno tahan pecak sekarang ni baru nyesel. Selawat citak la banyak habis, berangkat jugo belum tentu. Sudah tu segalo keluargo, dulur dan jugo jiron tetanggo laju melok susah mikirke makmano nian nasibnyo tu ? Bukan lagi mikirke kapan nian  nak diberangkatke haji, tapi makmano caronyo pacak lepas dikin dari tahanan pemerintah Filipina tu. Nah, runyam amun la sudah pecak itu. Wong yang ngolo’i cengki la ngilang kemano bae.

Cek Mamad narik nafas panjang, makmano jugo ado raso ibo diatinyo nyingok nasib 177 wong yang mak ini ari ditahan di Filipina tu. Mudah mudahan bae pemerintah Indonesia pacak ngurusinyo, paling idak membebaskenyo dari jeratan hukum di Filipina sano. Dan mudah mudahan jugo pacak jadi pengalaman untuk kito, terutamo yang nak naek haji. Payu, besabarlah dikit. Percayo bae, amon ado panggilan akan sampe jugo ke tanah suci.

Ye dak ?mang kodir