Berentilah Dulu Ngudut

Nyingok Mang Jakfar tekapar di rumah sakit, kesian jugo Cek Mamad. Wong yang selamo ini galak jadi rewang bekelakar atau main gap di kampung, dak bedayo tedede di rumah sakit.  Pokoknyo dak kuawo lagi nak benesan.  Amun uji bininyo Mang Jakfar tu keno serangan jantung. Awalnyo tu sakit di dado terus pecak saro nian benafas, cerito bininyo dengan rai sedih.

Serangan jantung ?  Makmano laju pacak keno serangan jantung tu ? Setau Cek Mamad, selamu ini dak pernah Mang Jafar ado masalah dengan jantungnyo. Sehat sehat bae. Apo gugup kareno diem diem masih berejo nak ngejoke jando parak rumahnyo ? Gugup kalu ketauan bininyo, laju jantung tu galak bedegap degup dak tekeruan ? Soalnyo amun lokak gugup nak ditingkep kpk dak ke ado, Mang Jafar tu bukannyo pejabat. Dio tu gawenyo bejualan di pasar 16 ilir sano.

Usut punyo usut, amon uji dokter, serangan jantung yang nimpo Mang Jakfar tu kareno kebiaasaannyo merokok. Memang amun dipikir pikir, nemen nian mang Jakfar tu ngudut. Pokoknyo pecak sepur. Putus nyambung bae. Amun diomongi, nak marah. Ujinyo, amun dak ngudut utak aku ni dak pacak bepikir. Pokoknyo dimano tempat bae bedepas depus asep keluar dari lubang idungnyo. Dio ringam nian amun masuk ke ruangan yang ado ac nyo, ringam kareno dak pacak ngudut.

Pernah  Cek Mamad cobo nasehatinyo, kareno ringam nyingoknyo dak berenti ngudut.  Mang, Cobo kalike seari berapo bungkus dikalike berapo taun Mang Jakfar sudah mulai ngudut, dikalike dengan hargo rokok sebungkus. Amun ditabung duit tu la banyak nian, kalu la  pacak untuk meli mobil. Diomongke pecak itu Mang Jakfar justru ketawo. Ujinyo, awak dewek idak ngudut kan ? La tebeli mobil belum ? Sudahlah, Mad. Berentilah awak pecak becengkian nak nasehati aku ni. Aku ni merokok dari kecik. Belajarnyo saro. Keno marah abah keno marah ebok. Laju nak berenti mak itu bae ? Awak tau dak, dokter bae lagi ado yang merokok.

Kareno itu pulok, Cek Mamad dak berani lagi nasehatinyo. Berejolah dewek, kato ati Cek Mamad. Kateik guno jugo nasehati wong tekak bantah. Bininyo bae la nak bebuih buih mulutnyo nyuruh lakinyo berenti merokok, masih jugo dak mempan. Dak tau amun la masuk rumah sakit kareno keno serangan jantung ni. Kalu nian Mang Jakfar laju sadar dengan akibat jahat dari merokok tu. Amun masih dak sadar jugo, nah dak terti lagi.

Memang dak gampang nak ngubah kebiasoan untuk berenti merokok. Mugolah dibungkus rokok tu la digawek pemerintah, peringatan bahayo merokok. Temasok narokke gambar yang serem serem akibat merokok. Wong masih bae depas depus sekendaknyo bae. Kadang yang nak nyerike ati tu, di bus atau oplet masih bae depas depus merokok. Padahal asap rokok tu bahayo nian amun diisap oleh wong lain. Kendak Cek Mamad, payu pikirke wong yang idak merokok. Kareno asepnyo tu pacak jadi penyakit buat wong lain yang ngisepnyo.

Tanggal 31 mei ni, diperingati wong sebagai hari tanpa tembakau se dunio. Biasonyo wong wong diminta untuk idak ngudut pas hari peringatannyo tu. Maksudnyo tu nak ngingetke segalo wong di segalo bucu dunio ni bahayonyo kebiasaan ngudut terdahap kesehatan. Mudah mudahan kito pacak melok memperingatinyo dengan idak merokok pas ari itu. Pacak dak ye ?mang kodir