Bisa Dipercaya

Kawan di Facebook

Namonyo Yanti Ardianti. Umurnyo sekitar duo puluh limo taun. Amun nyingok foto profilnyo, belagak jugo. Cantek. Kareno itu pulok Cek Mamad rajin ngajaknyo chating. Pokoknyo amun ado selo cengki ditegorkenyo oleh Cek Mamad. Apo lagi budak itu ramah. Amun ditegorke Cek Mamad cengki nyimbat tula. Tengah dalu bae masih disimbatinyo oleh Yanti. Kareno itu pulok, walau pun baru seminggu kenalan di facebook. Pecak la teraso la kenal lamo.

Pokoknyo sejak kenal dengan Yanti Ardianti, Cek Lela agak dilupokenyo. Gawenyo nyingok facebook lewat hp tula. Amun la pecak itu kateik lain kawannyo chating tu, Yanti Ardianti tulah. Kadang kadang, lagi bejalan bemotor, dio tahan berenti. Nyari tempat nyungkuk cuma nak melayani budak itu ngobrol. Cocok nian pulok dengan Cek Mamad, budak itu agak kanji. Pokoknyo amun dipancing dikit bae langsung nyambar. Pecak bensin keno api.

Kareno penasaran, Cek Mamad ngajak ketemuan. Soalnyo amun cuma di facebook bae dak besudahan. Cek Mamad bukan nak nyari kawan bae. Amun pacak nak nyari bini. Kalu nian budak sikok ini jodohnyo Cek Mamad. Cek Mamad la betekad amun dio galak nian, budak itu nak dijadikenyo bini. Cuma nak betemu dulu. Siapo tau antaro foto dengan aslinyo bedah jauh. Misalnyo la tuo. Amun dak tu make foto wong lain. Amun sekedar ado jerawat di rainyo dak apo apo. Ado panu jugo pacak diubati.

Berita Sejenis

MARQUEE PLAYER

PUASO

Bukit Siguntang

1 daripada 4

Janji betemu disepakati di restaurant di mall. Berejo Cek Mamad nyari modal. Dak keado nian nak ketemu dengan pujaan ati dak nggawak selawat citak. Apo lagi ini pertemuan pertamo. Cek Mamad harus pacak membuat Yanti yakin kalau Cek Mamad tu temasuk cowok idaman, cuman agak tuo dikit bae. Tapi soal umur sudah Cek Mamad omongke dengan dio, waktu chating. Pecaknyo dio dak keberatan. Justru dio nak nyari lanang dewasa. Ai, alangke cocoknyo, kato ati Cek Mamad.

Supayo dak payah becarian, keduonyo bejanjian nak pake pakaian apo. Yanti nak make kaos merah mudo dengan celano jin biru. Pecak itu pulok dengan Cek Mamad. Ecaknyo tu biar kompak. Biar seati. Caro wong lagi dimabok cinto. Pokoknyo selamo dijalan, lubang idung Cek Mamad tambah besak bae.

Nah, pas nak masuk ke tempat yang dijanjike, jantung Cek Mamad bedegap degup. Pecak nak icul. Ecaknyo tu bedebar debar. Mato Cek Mamad kula kilir, nyingok cewek pake baju merah muda dengan celano jean biro. Tapi dak kateik. Lamo Cek Mamad masati tempat itu. Cuma dak ketemu jugo. Ado memang yang pake kaos merah mudo, tapi lanang. Ai, cengki bukan. Lagi Cek Mamad celingak celinguk, ado yang negorke.

“Hai, Cek Mamad ye ?,”Cek Mamad tekejut nenger suaronyo. Tambah tekejut lagi nyingok wongnyo. Memang dio pake baju merah mudo dan jugo jean. Cuma dio ado jakunnyo. Ai, banciii, kato ati Cek Mamad. “Aku Yanti,”

“Yanti apo Yanto ?”kato ati Cek Mamad.

Dak ngomong lagi Cek Mamad bedewis ninggal budak itu. Ketemu lanang mati kartu ruponyo. Buto kiyu (KORANKITO.com/Mang Kodir)