TEJINGOOOOK

Cek MamadNyingok rai Mang Amit lagi manyun. Cek Mamad nyengeh dewek. Kato ati Cek Mamad, mano rai la dak semekuk tambah manyun tuo. Nah, kateik lagi nian ambe’an.  Nyungkuk pulok di selo warung, pecak beruk nak ngijoke pisang. Rasonyo nak digutuknyo pake pempek, cuma takut gek jadi balak bae. Soalnyo tedenger khabar, kalu Mang Amit lagi galau. Soalnyo dio ditinggalke Cek Enab minggat. La tuo masih galau pulok, kato ati Cek Mamad. Umur la parak palak enam. Cuman, yang namonyo cinto kan, uji wong tu, dak kenal umur.

Cek Mamad nyobo nyeleik ke seluruh warung. Siapo tau, budak yang cerito tadi, cuma ngota’i. Memang kateik nian Cek Enab. Cuma ado Mang Amit dewe’an. Berarti bener nian cerito yang sampe ke kuping Cek Mamad, kalu Cek Enab minggat. Cuman minggatnyo Cek Enab kareno apo, itu yang Cek Mamad lum tau nian. Ado yang ngomong, Cek Enab minggat kareno nak dicabuli Mang Amit. Ai, bangso tuo kateik aguk jugo amun memang bener nian cerito itu.

Terus Mang Amit manyun tu, apo gugup takut dilaporke Cek Enab ke plisi ? Ai, pacak nian. Kalu bener kejadiannyo tu pacak nian Mang Amit beurusan dengan plisi. Ado pasalnyo nian. Cuman Cek Mamad dak apal pasal berapo nian. Tapi la tau pecak itu, ngapo masih bejualan ? Idak berejo belari pulok?

“Kopi, Mang,”kato Cek Mamad, buyarke lamunan Mang Amit.

Mang Amit pecak tesentak. Terus pecak sungkan nian nak nyeduke kopi.

“Mano Cek Enab, Mang ?”tanyo Cek Mamad pulok, ecak ecak dak tau.

“La ku usir,”simbat Mang Amit.”Menike kepalak bae,”

“Nah, ngapo, Mang ? ,”tanyo Cek Mamad tekejut nian.

“Ngapo kau pecak tekejut tu ? Kau naksir dengan dio ? Galak kau bebini dengan banci ?,”kato Mang Amit pecak kesahangan.

“Dak ke ado ?!,”Cek Mamad pecak dak percayo.

“Aku ni tejingoooook….,”uji Mang Amit pecak kesel nian.

Cek Mamad melongok cak wong bongok. Tejingok ? Ai, pantes nian Mang Amit laju melamun tuo tu. Cek Mamad nak ketawo.

“Dak usah ketawo tawo…sial tau dak ?,”tambah Mang Amit.  (korankito.com/mang kodir)