Dunia Maya

Sebenernyo sebelum memutuske profesinyo sebagai tukang ulo, la cukup banyak macem dan jenis gawean yang dicobonyo. Cuman dari sekian banyak jenis gawean yang pernah dicobonyo. Yang paling bekesan dan dak pacak dilupokenyo, waktu dio begawe jadi tukang jago warnet. Waktu itu dio baru tamat es em a. Nah, kareno dak kuliah. Berejo nyari gawe. Dapetlah gawean tukang jago warnet. Caro tukang jago warnet. Pegi pagi. Baliknyo malam. Sampai warnet tutup.

Nah, nyainyo yang waktu la berumur sekitar 69 taun. Bingsal nyingok cucung kesayangannyo galak balik dalu. Kemano nian budak sikok itu. Nah, pas ketemuan betanyolah Nyainyo ni dengan Cek Mamad

“Kemano bae kau ni Mad. Pegi pagi balik dalu,”tanyo Nyai Cek Mamad.

“Caro begawe di dunia Maya, Nyai…,” jawab Cek Mamad.

“Ai…siapo Maya tu ? Apo kau la be bini ? Kalu kau la bebini dak ke ado nian aku dak tau,”uji Nyainyo bingung dewek.

“Bukan bini, Nyai…,”

“Terus apo ? Jangan Mad kalu bukan muhrim. Bedoso,” kato Nyainyo lagi.

“Maya tu bukanyo betino, nyai…,”Cek Mamad cobo nak jelaske. Tapi Nyainyo motong.

“Astagfirullah…ngucap Mad…ngucap….,” kato Nyainyo dengan nada agak tinggi.”Betino masih banyak, ngapo kau laju samo lanang tu…dosonyo dak terampuni, Mad….,”

“Ui, Nyai…maya tu bukan betino…bukan pulok lanang…,”Maksud Cek Mamad nak nyobo njelaske. Tapi Nyainyo la tepekik pecak wong kemasu’an.

“Ya, Allah…ampuni cucungku tesesat ini…ternyato dio seneng dengan banci….”

“Ui, nyai dengerke dulu,” kato Cek Mamad dengan kesel. “Denger bae bae. Jangan Nyai tu salah pengertian. Maya tu bukan betino. Bukan lanang. Bukan jugo banci. Bukan jago manusio,”

Rai nyai melongo bongo. Tejelit matonyo nenger penjelasan Cek Mamad. Pikir Cek Mamad la faham nyai tu maksudnyo.

“Jadi…selamo ini kau tu pacaran dengan jin yo Mad ?,”kato Nyainyo. Terus pingsan.

Nah, tekejut nian Cek Mamad nyingoknyo. Dak terti Cek Mamad siapo nian yang salah. Apo dio kepinteran igo. Apo nyainyo yang kepinteran igo. Apo kareno umurnyo la 69 ? Makmano kalu 96 ? Ai lokak tambah siru bae. (KORANKITO.com/mang kodir)