Bisa Dipercaya

Buntu Tu Dak Lemak Nian

Amun dijingok di ktpnyo, Cek Mamad ni wira swasta gawenyo. Amun aslinyo nian gawenyo tukong ulo. Apo bae amun pacak diuloke yo di uloke. Ngulo motor, mobil, tanah. Temasuk ngurusi surat menyurat apo bae. Nah, la sebulan ini pecaknyo gaweannyo tu macet. Kateik yang jalan. Sementaro pengeluaran dak pacak di stop. Nah, pening palak Cek Mamad.

Alangke saro amun lagi buntu ni. Segalo jalan jadi gelep. Dak kejingoan arahnyo. Nyingok rai wong galak dak jelas. Wong belagak bae kejingoan jahat. Apo lagi kalu rai wong tu memang jahat, tambah pecak antubae. Yang pacak buat penjingo’an jadi terang, kateik lain selain duit alias uang alias money alias selawat citak. Cuma yang namonyo buntu, makmano nak nyingok duit. Nyingok bayangannyo bae lagi saro setengah mati.

Cek Mamad manyun nyingok isi dompeknyo. Tebal dompetnyo tu. Pokoknyo amun dijingok sekali liwat, cengki pikir wong dompet toke karet. Cuma amun la tebukak. Isinyo tu kertas galo, surat menyurat dak tekeruan, temasuklah kartu namo. Entah kartu namo siapo bae yang ado di dalem dompetnyo. Amun tujuh belas (17) lembar ado. Pokoknyo kateik yang pacak dijajanke. Paling yang berhargo surat surat motor itulah. La nak bayar pajaknyo pulok.

Berita Sejenis

MARQUEE PLAYER

PUASO

Bukit Siguntang

1 daripada 4

Nah, mentak palak Cek Mamad. Ngapo laju buntu nian pecak ini.  Cek Mamad nyingok dompetnyo dewek. Nak dibuangke sayang. Cobo dijingok diselip selipan dompetnyo, kalu nian ado dui nyelip. Soalnyo Cek Mamad temasuk yang hobby nyelipke duit di dompet. Selembar (1) duo (2) lembar. Duit tu dilipetnyo kecik kecik. Masukenyo ke selo selo dompet. Maksudnyo, serep kalu tepepet pecak inilah.  Ai, cacaaam ! kateik isi nian, kato hati Cek Mamad kesel. Cek Mamad nggarut kepalanyo.

Makmano nian caro nak nyari duit ni ? Soalnyo Cek Mamad ni ado janji nak ngajak Cek lela jalan jalan malam kagek. Paling idak amun la bejalan tu, yo bejajan. Cuman selawat citaknyo mano untuk bejajan tu ? Nah, kateik pilihan lain. Berutang tulah, piker Cek Mamad. Begancang Cek Mamad ngeluarke hpnyo.

Tapi siapo nian yang nak ditelpon ni ?Tibo tibo Cek mamad teringet dengan Kadir. Kadir tu kawannyo jugo. Dio tu wongnyo sura. Amun ado duit dak sayang ngenjuk atau ngutangi kawan. Pikir Cek Mamad, kalu nian Kadir galak nulungnyo sekali ini. Nah, dengan semangat empat limo, Cek Mamad nyari nomor Kadir di hpnyo. Ketemu.

Ruponyo telpon rumah.  Dak apo. Tapi nak pake kode local dulu, piker Cek Mamad. Cobo ditelponnyo. Baru  nyambung, tau tau putus.  Ternyato pulsanyo habis. Nah, raso nak dibantingkenyo hpnyo. Ngapo laju teko pulsa melok habis ini uiiii ?!!! jerit ati Cek Mamad cak nak nangis.

Lamo Cek Mamad tediem. Apo kareno tedesak pecak inilah wong laju bepikir gawe dak tekeruan tu ? Pecak maling, nodong, merampok dan temasuk jugo korupsi ? Cuman amun nyingok berita di tivi tu, yang ditingkep KPK tu rasanyo wong beduit galo. Ado pejabat, pengacara, hakim, sampe sampe kepala daerah? (KORANKITO.com/Mang Kodir)