Bisa Dipercaya

Caro Kito

Bederuuuuuut bunyi mulut Cek Mamad ngirup cuko pempek. Pokoknyo pecak lemak nian, pecak ladas nian. Dak pulok nak takut sakit perut apo mencret kareno kenemenan igo ngirup cuko. Berejolah perut. Memang dari kecik bingen dio ni la hobby nian ngirup cuko. Makan nasi bae dio kadang bekuah cuko. Amun ditanyo wong, ngapo laju pecak itu. Biasonyo jawab Cek Mamad selalu bae, caro kito. Caro kito wong plembang.

Maklum bae, Cek Mamad ni asli wong plembang nian. Dari yai samo nyainyo dulu, pempek samo cuko tu selalu ado di rumah. Pecak itu jugo dengan abah dan iboknyo. Cuma yang nemen ngirup cuko ni, cumin Cek Mamad tulah. Amon makan sikok, cukonyo pacak duo tigo kali bubuh. Nah, makmano amun limo ikok ? Kali ke bae. Nah, Ce Mamad ni seneng nian makan pempek di warung Mang Amit. Amun uji Cek Mamad cuko pempek mang Amit terbaik di dunio.

Apo lagi baru baru ini Mang Amit amun bejualan pempek galak direwangi Cek Enab. Jando. Umurnyo la kepalak tigo. Cuman penampinalannyo pecak penyanyi dangdut Cita Citata. Khabarnyo lakinyo mati ditumbur bus kota. Uji Mang Amit dio masih ado bau dulur dengan Cek Enab. Makmano jelasnyo, Cek Mamad dak pulok ngeluruinyo. Yang jelas sejak Cek Enab ado di warung Mang Amit, tambah rajin bae Cek Mamad makan pempek di sano.

Berita Sejenis

MARQUEE PLAYER

PUASO

Bukit Siguntang

1 daripada 4

Lagi musim hujan pecak ini tambah lemak bae makan pempek sambil direwangi Cek Enak. Pokoknyo dak cukup limo bae makan pempek. Apo lagi Mang Amit sedang tekantuk kantuk beruk. Tambah ladas bae ngobrol dengan Cek Enab.

“Bangka Belitung la banjir. Padang la banjir. Jakarta langganan tiap taun. Mudah mudahan kito dak kebanjiran,”uji Cek Mamad ngomong dewek. “Banjir ni sebenernyo disebabke oleh gawe kito dewek. Kareno buang sampah ke got, ke sungai. Got jadi buntu. Sungai jugo pecak itu,”

“Amun buntu. Runyam galo urusannyo,Mad”simbat Mang Amit sambil melekke biji mato.”Bukan banjir bae urusannyo. Utang jugo tambah banyak,”

Cek Mamad meraso mang Amit lagi nyindir dio. Pecaknyo mang Amit tu kurang setuju Cek Mamad deketi Cek Enab. Kareno kesel, akhirnyo ditanyokenyo nian dengan Mang Amit. Ngapo nian Mang Amit pecak kurang setuju dio neketi Cek Enab ?

“Kareno Cek Enab tu calon bini aku,”jawab Mang Amit.
Nah, tekejut nian Cek Mamad nengernyo. Pecaknyo petir diluar tu nyamberke kepalaknyo. Memang dio tau mang Amit tu Dudo. Tapi Mang Amit tu la tuo. Sudah itu kan ujinyo, masih dulurnyo…nah, makmano itu ?

“Caro kito, Mad,” kato Mang Amit sambir cengar cengir.
Nah, Pedes nian raso cuko Mang Amit ari itu. (KORANKITO.com/Mang Kodir)