Pokoknyo… Eksis Dikin…

Rai Cek Mamad tambah dak tekeruan bentuknyo. Mengot kiri. Mengot kanan. Pecak topeng plastik yang galak dipake bandit dalam film film barat. Cuma kareno nyingok postingan kawannyo di facebook soal akibat dari penyakit kelamin. Cek Mamad mbayangke kalu penyakit itu tekeno di dio. Ai, cacam…lokak runyam urusannyo. Alangke panjang rentetannyo. Belum lagi kalu abah iboknyo tau, calon mertuonyo tau…lokak urung galo segalo gawe.

Nah, Cek Mamad baru sadar ngapo nian Yainyo dulu galak ngingetke, supayo nyago kelamin. Mun dak di jago bahayo akibatnyo. Dulu Cek Mamad galak nyimbat amun diomongi yainyo. Ai, yai pecak ayam bae…nak dijago. Biasonyo langsung disimbati yaitunyo., memang pecak ayam…amun dak dijago galak nyetuk basing. Nah, nyetuk basing itu yang bahayo. Amon Abah dengan Eboknyo lain lagi. Kateik lain nak nyuruh bebini. Wajar bae amun abah iboknyo nyuruh Cek Mamad bebini tu. Umur Cek Mamad mak ini ari la kepalak tigo. Tigo Duo. Abah ni kawin dengan ibok kau sebelum umur tigo puluh.

Cuman masalahnyo, Cek Mamad belum ado calon yang mantap. Amun belinjangan tu la neman nian. Cuma pecaknyo kateik yang betahan lamo. Dak tau. Apo nian sebabnyo. Amun soal rai, rasonyo jadilah. Paling idak ado mato, ado idung, ado mulut. Penampilan rasonyo dak beda jauh dengan budak muda mak ini ari. Pokoknyo dak ketinggalan. Terutamo soal telepon genggem. Dio dak galak nian yang cuma pacak nelpon bae. Paling idak ado camera samo fasilitas lain yang pacak nunjang hobbynyo. Soalnyo Cek Mamad temasuk pencinta social media. Dari mulai face book, intagram, whatsApp, twwiter, bbm dan segalo salat bangat yang lagi musim.

Dari pertemanannyo di sosmed, la banyak Cek Mamad kenal dengan cewek cewek cantik mulai dari budak smp, sma, budak kuliahan, yang sudah begawe, setengah tuo sampe ke ibu ibu rumah tanggo. Ado beberapo yang sudah copy darat. Cuman yo. Pecaknyo Cek Mamad kecewa dengan cewek itu. Soalnyo antaro gambar di medsos dengan kenyataan yang ado beda jaoh. Di facebook rainyo licin pecak artis, aslinyo ado panu samo kudis. Sikok lagi lagi, fotonyo cantik nian. Pas ditemui ternyato nangino…lanang setengah betino alias banci.

Walau pecak itu, Cek Mamad dak putus asa. Kagek ado bae yang nempel jadi jodohnyo. Kareno itu usaha mesti gencar, kato ati Cek Mamad sambil befoto dewek alias selfi. Sesudah befoto dijingoknyo rainyo. Dipilihnyo mano yang paling belagak. Sudah itu kirimkenyo ke facebook. Di bawah foto itu di tulisnyo…pokoknyo eksis dikin…
Dak lamo sudah itu, ado cewek ngenjuk komentar. Alangke belagaknyo, kak. Dapet pujian pecak itu langsung dijawabnyo oleh Cek Mamad. Caro kito.

Pas dijingoknyo yang komen, ternyato cewek nangino tempo ari. Nah lantak. (KORANKITO.com/Mang Kodir)